एकदा वाचून तर पहा... भाग ४
"एकदा वाचून तर पहा!" या सदरात, आम्ही दुर्मुखलेली परंतू वाखाणण्याजोगी, वाचायलाच हवी.. अशी काही पुस्तकं तुमच्यासमोर आणण्याचा प्रयत्न करत आहोत. प्रत्येक महिन्याच्या शेवटी किंवा एखाद्या विशेष दिवसानिमित्त, त्या खास क्षणांचे औचित्य साधून विशेष अशी पाच पुस्तकं आम्ही तुम्हाला सुचवू जी तुमच्या वाचनाची खोली वाढवतील.. जाणिवेचं वर्तुळ विस्तृत करतील.. व नवीन माहिती तुमच्या समोर आणतील.
प्रत्येक पुस्तक सुंदरच असतं, पण हि पुस्तकं विशेष सुंदर आहेत.. तेंव्हा जास्तीत जास्त लोकांपर्यंत हि पुस्तकांची यादी पोहचवा; आणि आपल्या वाचन संस्कृतीच्या चळवळीचा एक भाग व्हा!
आजची पुस्तकं...
१. नदीष्ट - मनोज बोरगावकर
२. वनवास - प्रकाश नारायण संत
३. रुह - मानव कौल
४. माझंही एक स्वप्न होतं - डॉ. वर्गीस कुरियन
५. माझी जन्मठेप - वि. दा. सावरकर
२. वनवास - प्रकाश नारायण संत
३. रुह - मानव कौल
४. माझंही एक स्वप्न होतं - डॉ. वर्गीस कुरियन
५. माझी जन्मठेप - वि. दा. सावरकर
१. नदीष्ट - मनोज बोरगावकर
नदी हा इथे केवळ भौगोलिक प्रवाह नाही, तर माणसांच्या आठवणी, शोषणं, आणि अस्तित्वाशी जोडलेला एक गूढ प्रवास आहे. ग्रामीण भागातील कथा, बदलत्या नात्यांच्या छटा, आणि माणूस म्हणून आपण कुठे वाहत जातो आहोत याचा हा चिंतनशील आरसा आहे. बोरगावकर यांची भाषा सौंदर्याने नटलेली, शैली लयबद्ध व अर्थगर्भ आहे, पण विचारांना हादरवणारी आहे. हळू हळू तुम्ही नदीत उतरता, खोल खोल आत.. आणि "नदीष्ट" होता! नदी इथे नुसती वहात नाही.. ती माणसाच्या अस्तित्वाला वाहून नेते. ग्रामीण पार्श्वभूमी, जिव्हाळ्याची पात्रं आणि खोल विचारांनी भरलेली कथा.२. वनवास - प्रकाश नारायण संत
वनवास, एका लहान मुलाच्या ग्रामीण जीवनातील आत्मीय अनुभवांची विलक्षण कहाणी आहे. त्याच्या मानसिकतेचा, भावविश्वाचा, मनोवृत्तीचा नेमका वेध घेणारं हे ललित लेखन आहे. मुलांमधील गुंतागुंतीची भावनात्मक गुंफण, त्यांच्या मनातील भीती, कुतूहल आणि त्यांच्या निरागस नजरेतून मोठ्यांच्या जगाची सफर.. ‘वनवास’ एक कोमल मनाचा प्रवास आहे. भाषेतील निरागसता, नितळता आणि भावनांतून प्रगटणारी चिंतनशीलता हे संत यांचं वैशिष्ट्य. हि कथा फक्त शारीरिक-भावनिक प्रवास नाही, तर आत्म्याचा शोध घेणारा एक अनमोल प्रवास आहे. कोमल, विचारप्रवृत्त करणारा अनुभव.३. रुह - मानव कौल
‘रुह’ म्हणजे आत्मा, पण या पुस्तकात तो आहे काश्मीरच्या आठवणींचा आणि विस्थापनेच्या वेदनांचा आत्मा. हा आत्मा केवळ आध्यात्मिक नाही, तर अत्यंत सर्जनशील आणि नाजूकही आहे. मानव कौल यांनी त्यांच्या लहानपणीचा, त्यांच्या कुटुंबावर आलेल्या जबरदस्तीच्या स्थलांतराचा आणि एकूणच ओळखी गमावण्याचा अनुभव फारच हळुवार शब्दांत मांडला आहे. हे एक भावनिक आणि वास्तववादी लेखन आहे, जे वाचकाला इतिहासातल्या एका विस्मरणात गेलेल्या जखमेचं दर्शन घडवतं. हा प्रवास प्रेम, वेदना आणि अस्तित्व यांना शब्दरूप देणारा आहे. यातील प्रत्येक वाक्य एखाद्या शांत स्फोटासारखं वाटतं.४. माझंही एक स्वप्न होतं - डॉ. वर्गीस कुरियन
भारतीय ‘श्वेत क्रांती’चे जनक डॉ. वर्गीस कुरियन यांचं हे आत्मचरित्र. त्यांनी देशातील दुग्धव्यवस्थेला नवा आकार दिला. ‘अमूल’ सारखी सहकारी चळवळ उभी करून लाखो ग्रामीण शेतकऱ्यांना सशक्त केलं. हे चरित्र एका सामान्य माणसाच्या असामान्य दृष्टिकोनाची साक्ष आहे. त्यांचं स्वप्न, संघर्ष आणि व्यवस्थेविरोधातील शौर्य.. केवळ नेतृत्वासाठी नव्हे, तर सामाजिक परिवर्तनासाठीही प्रेरणादायी आहे. दुग्धक्रांतीचे जनक, देशासाठी आपलं आयुष्य वाहून घेणाऱ्या एका अवलियाच हे पुस्तक खऱ्या अर्थाने माणसाने “कसे घडावे” याचं जगप्रसिद्ध उदाहरण आहे.. प्रेरणा आहे.५. माझी जन्मठेप - वि. दा. सावरकर
स्वातंत्र्य लढ्यातील कट्टर भूमिका, अंदमानातील काळकोठडीतले अमानुष अनुभव, आणि त्यातून उमटणारे निडर राष्ट्रप्रेम. ‘माझी जन्मठेप’ हे फक्त आत्मचरित्र नाही, ती इतिहासाची साक्ष आहे. सावरकरांचा त्याग, विचारसरणीवरचा ठाम विश्वास आणि देशभक्ती.. सहनशीलतेची परिसीमा दाखवणारा हा प्रवास आहे. सावरकर म्हणजेच असीम धैर्याची झलक आहे. त्यांचं बलिदान, देशप्रेम, आणि सशस्त्र क्रांतीसाठी वाहिलेलं आयुष्य पाहून तुमचं रक्त सळसळून उठेल. देशभक्तीचा अर्थ काय असतो, हे शब्दांनी नव्हे, तर व्यवहारातून उलगडून सांगणारं हे पुस्तक आहे.